ULU O TE MAALO FAKATASI KI FAKAFIAFIGA O TE 50 TAUSAGA O TE TU-TOKOTASI O NAURU

Te Ulu o te Maaloo, Tena ‘Malu Enele Sosene Sopoaga ne ‘kamigina ne te Pelesitene o te Maaloo o Nauru ke fakatasi atu ki fakafiafiaga o te Fakamanatuga o te 50 Tausaga Tu-Tokotasi o te Maaloo o Nauru. Tena ‘Malu Enele ne olo fakatasi mo tena avaga, Salilo Sopoaga, te Ofisa Galue mai i te Minisitulii o Maloo ki Tua, Fakataukoloa, Tualisi, Enivailomene mo Leipa, Asogali T. Panapa mo te Ofisa Tausi o te Ulu o te Maaloo, te satini pulisimani, Penivao Penete.

Ne sui mai ne te Pelesitene o Nauru o fakaoko mai a te fakafetai ki te Ulu o te Maaloo, Enele S. Sopoaga ona ko tusaga ‘lei kola ne fai ne tino Tuvalu ki tena fenua i tausaga e uke ko ‘teka atu, i te taimi koi keli i ei a te one (1960-1990) kae koi ga’lue i ei a tino Tuvalu mo te Kamupane One o Nauru. A tino Nauru e fakaaloalo kae fakamaluga ne latou a tusaga a tino Tuvalu kola ne ga’lue i Nauru I aso konaa.

Ne fakailoa mai foki ne te Pelesitene o Nauru a tena ‘lago  o fesoasoani ki Tuvalu i so se mea tela e mafai ne tena maaloo o fai. Te tasi o mea mai i ei ko te talia ne tena maaloo a te manakoga o Tuvalu ke aumai a fatu ‘lasi kola ne ‘kati mai i koga keli o te one i te taimi koi keli ei a te one, kae ne faka’mafa mai ne ia me i fatu konei ko fatu foki loa kola ne ‘kati ne tino Tuvalu kae koi ga’lue i ei latou mo te Kamupane One o Nauru. I pati a te Ulu o te Maaloo o Tuvalu me i fatu konei ka fakaogaa mo puipui a te tafatai i te Queen Elizabeth II Park.

local1Mafutaga a te kaumalaga a te Ulu o te Maaloo, ‘Malu Enele Sopoaga mo fanau Tuvalu i Nauru.
Te avaga a te Ulu o te Maaloo, Salilo tena e tuu I te unumua mo tena lava lanumoana

Te Ulu o te Maaloo, Enele ne fakafetai atu foki ki te Maaloo o Nauru mo ie mafutaga mo se va ‘nofo gali tela ne atiake i te vaa o tino Tuvalu kola ne ga’lue i Nauru mo olotou kaaiga, mo tino Nauru, mai i taimi ko ‘teka ke oko ki te taimi nei. Ne fakafetai atu foki a Tena ‘Malu Enele ki te Maaloo o Nauru mo fakamanuiaga kola ne maua ne tino Tuvalu mai i galuega kola ne fai ne latou i Nauru. Ne fakamaonia mai foki ne ia me koi isi eiloa nei se fakapotopotoga a fanau Tuvalu tela e tu nei I Nauru, kae ne maua se avanoaga o te lotou kaumalaga ke ‘kamigina ne te fakapotopotoga a fanau Tuvalu i Nauru ki se ‘kaiga mo fakafiafiaga faka-Tuvalu. Ne fakafetai atu foki a te Ulu o te Maaloo Enele ki te Maaloo o Nauru mo te fakaaaloa ne latou a foitino o tino Tuvalu kola ne ‘mate kae ne tanu i Nauru ke tumau eiloa o tuku i kona.

Faifeau Dr. Kitiona Tausi

Leave a Reply