(Afasene Iosefa)
A te galuega i te fale pasese o vakalele fou ko maaea nei,kae ko te Kamupane Fakatuu’tuu, Reeves Iternational mot e CCB ENVICO tela se galuega fai fakatasi a laua, ko oka nei laua o tuku atu ki te Maaloo o Tuvalu.
Te Menetia o te Tuvalu Aviation Investment, Vitoli Iosefa ne lipooti mai ne ia me koi tuai o tuku atu ki te Maaloo te fale, kae mo te ‘lei o latou kola ka fakaaoga ne latou a te fale, a te Menetia o te Kamupane Fakatuutuu tela ne onoono ki te galuega ne fai sena asiasiga i te fale ko te mea ke fakaasi faka’lei ne ia ki tino kola ka fakaaoga ne latou a te fale a mea taaua i loto i te koga tenei.
Ne fakaopoopo mai ne Vitoli me ko oti ne fakatoka a te polokalame mo te ‘talaga ne se komiti galue tela e sui atu i ei a tino kola ka aogaa ki a latou a te fale tenei kae ne onoono ki ei a te Kapineta. A te ‘talaga o te fale ka fai i te aso ma taeao, Asotolu, 28 Fepuali 2018.
A te galuega tela e ‘tusa mo te AU$5.07 miliona ne ‘togi ne te Pagike o te Lalolagi e auala i sena tupe fesoasoani ki Tuvalu
Kae koi faite te fale pasese, a galuega katoa kit e faiga o pasese mo kaakoo ne fai i te Falekupule o Vaiaku.
Vaiaku Falekaupule i te taeao o te aso nei, Asolua, 27 Fepuali kae ko oti ei ne foki te vakalele tela ne taunu mai i te taeao loa.