Category Archives: TALA O HAAPAI

E ‘POLE TE MAALOO I TE OLAGA ‘LEI O TINO TUVALU KO ‘NOFO ‘SEE I NIUSILA

A tino Tuvalu kola ko se tonu mo te tulafoo a te ‘nofo o latou i Niusila se mataupu ko tai kalevalevaa  kae ko maaloo kola ko ‘teka atu nei, ne taumfai malosi o fai se fakatokaga ki ei kae e pela loa e seki manuia a olotou taumafaiga. I pati a tena ‘Malu Sopoaga me i tena maaloo tenei, ko fai foki ne ia se toe taumafaiga o toe onoono ki te mataupu tenei mo te fakamoemoega ke maua se fakatokaga ki ei.

I tena asiga fakamuli nei ki Niusila kae i tena fakasautalaga i te Asofa, 22 Fepuali, ana pati me i tena maaloo, tenei ko ga’lue fakatasi mo te Maaloo o Niusila fou i se taumafaiga ke na fakatoka a te mataupu tenei. I pati a Enele me kaati se aofaki o se 500 tino Tuvalu e fakavasega pela me ne tino ko ‘nofo ‘se i te tulafono i Niusila, kae ko latou e ‘nofo munimuni kola e tele’tele valevale fua o ‘sala ne koga mo olotou nofo i olotou kaaiga. A olotou tama’liki e se faka-a’koga kae e seai foki ne olotou akauni i pagike tela la a latou e se olo ki pagike kae e ga’lue ‘muni foki. Ko oko loa i te faka’lofa a olotou olaga kae ko oko eiloa i te manakogina ne latou se fesoasoani.

 

I tena sau’talaga mo te Ulu o te Maaloo o Niusila fou, Jacinda Artern, ne fakatagitagi atu a tena ‘Malu Enele ke mafai ne tena maaloo o kilo alofa aka ki te tulaga o tino Tuvalu kola ko ‘nofo mo te ma’taku i a latou ma maua kae faka’foki mai fakavave. Nisi o latou ko oti ne ‘nofo i Niusila i se leva tela ko mafai o maua a te ‘nofo tumau o latou. Nisi o olotou tama’liki ko oti ne fai a olotou kaiga kae ko fai foki a olotou fanau. Ne avatu eiloa a tena fakatagi mo te ava ki a Jacinda ke mafai o tuku atu ne Niusila a te taliaga ke ‘nofo tumau latou i Niusila.

 

Ne fakapa’tonu ne Enele me i tena Maaloo mo te Maaloo o Niusila ka ga’lue fakatasi ki luga i te mataupu tenei. Te mea muamua, ne talia ne latou ko tino konei kola ko taia i te tulafono me ko ‘nofo ‘see  latou i Niusila ke fakatoka katoa faka’lei a olotou pepa kola e manakogina ne te Matagaluega o Pepa Fo’lau kae ke faulu atu ki te Ofisa o te Matagaluega kae ka onoono a latou ki ei, kae fai foki se fakatokaga ki ei.

 

Tena la, ko akai atu ia ki tino Tuvalu katoa i Niusila kola ko taia mai i lalo i te ‘nofo see ke faka’logo kae ke fai a manakoga konei. I pati foki a Enele me i tena maaloo ko ‘saga tonu eiloa ke na sautalagina a te mataupu tenei kae ko tona fakamoemoega ke talia ne Niusila ke ‘tuki a pepa nofo tumau o latou katoa.

TE AKOGA MOTUFOUA TAI ‘LEI ATU MO TE PLOKALAME FOUNDATION A TE USP

A te polokalame ko te USP Foundation tela ne fai aofaga muamua loa ki ei me ka fakaaogaa i te Akoga Lasaga Lua i Motufoua i loo te kalikilamu a te Form 7 i te tausaga nei, ko faka’tali nei ki te taliaga a te Kapineta.

Te Pule o te USP Centre, Dr Rosiana Lagi ne lipooti mi ne ia me I te Failautusi Tumau o te Minisitulii Dr. Tufoua Panapa ko oti ne fakamonia ne ia me I te polokalame ka kamata i te tausaga fou kae ka faka’tali nei ki te ikuga a te Kapineta.

A te akoakoga o te polokalme i te Akoga Lasaga Lua i Motufoua se vaega o te polokalame tela e akoako i akoga kae ko te mea e ‘lei i ei i Motufoua me isi eiloa ne faiakoga kola e ga’lue tumau, e iai a kopekopega mo akoakoga, a tama’liki a‘koga e faka-a’koga eiloa ne faiakoga i aso katoa mo nisi o mea kola e manakogina.

I tafa o mea konaa, i pati a Dr Lagi a te ‘togi ka tai maamaa ki maatua ke ‘togi ne latou a olotou tamaliki tela se $70.00 i te mataupu e tasi kae se pela mo te ‘togi i te USP Centre e $280.00 i te mataupu e tasi.

“I te USP Campus i konei, e iai ne faiakoga se tumau kae ko ia fua tokotasi a te faiakoga tumau tela e akoako kae pulepule foki kae i te taimi foki tena e tausi kae fakateletele ne ia a te akoga

I tena fakafesiliga e uiga mo te aofaki o tamaliki a’koga i te tausaga nei, i pati a Dr. Lagi, “Ko lasi a te fuainumela tela se aofaki e ‘tusa mo te 318 kae ko au e talitonu me koi isi ne tamaliki koi au’mai o fakamau a olotou igoa.”

Ne faka’soko loa ana pati me e tokouke tama’liki a’koga e fai a olotou mataupu saukatoa i te tausaga nei. Nisi o latou e fai ne latou e fa mataupu i te vaituaga e tasi.

Ne fai mai foki a pati a Dr. Lagi me e isi se iloiloga tela ne fai ne te USP kae ne iloa aka i ei me i tamaliki a’koga i te USP Centre Campus.

Ko sui mai ne Dr. Lagi a te Tuvalu USP Campus o ‘moli atu a tena fakafetai ki te Maaloo o Tuvalu mot e ‘togiga ne ia a mataupu a tama’liki a’koga, te MEDU mo te SELF, mo nisi o fesoasoani kae e se puli i ei a maatua o tama’liki a’koga.

 

Afasene Pese kae ne ‘fuli ne Kitiona Tausi

Recent Entries »